کاک پٹ میں ویڈیو کیمرے لگانے کیلئے مضبوط دلیل موجود ہے، سربراہ آئی اے ٹی اے
عالمی ہوابازی کی تنظیم (آئی اے ٹی اے) کے سربراہ نے کہا ہے کہ فضائی حادثات کی تحقیقات میں مدد کے لیے ایئرلائن کے کاک پٹ میں ویڈیو کیمرے لگانے کے حق میں ایک مضبوط دلیل موجود ہے۔
یہ تبصرے انٹرنیشنل ایئر ٹرانسپورٹ ایسوسی ایشن (آئی اے ٹی اے) کے ڈائریکٹر جنرل ولی والش کی جانب سے اُس ابتدائی رپورٹ کے اجرا کے بعد سامنے آئے، جو پچھلے ماہ ہونے والے ایئر انڈیا حادثے سے متعلق ہے، رپورٹ میں انکشاف ہوا کہ طیارے کے انجن کے فیول سوئچز بند کر دیے گئے تھے۔
یہ حادثہ 12 جون کو پیش آیا تھا، طیارے میں سوار 242 میں سے صرف ایک فرد بچ سکا، جب کہ زمین پر موجود 19 افراد بھی ہلاک ہو گئے تھے۔
ولی والش (جو خود بھی ایک سابق کمرشل پائلٹ ہیں) نے کہا کہ وہ سمجھتے ہیں کہ پائلٹس کو کاک پٹ میں ویڈیو کیمرے لگانے پر تحفظات ہو سکتے ہیں۔
انہوں نے مزید کہا کہ کیوں کہ ہم نے آئی اے ٹی اے میں اس پر بحث نہیں کی، تو ذاتی طور پر میں سمجھتا ہوں کہ حادثات کی تحقیقات میں مدد کے لیے کاک پٹ میں ویڈیو شامل کرنے کے حق میں ایک مضبوط دلیل موجود ہے۔
والش نے مزید کہا کہ یہ بالکل ممکن ہے کہ آواز کی ریکارڈنگ کے ساتھ ویڈیو ریکارڈنگ بھی تحقیق کاروں کو تحقیقات کرنے میں نمایاں مدد فراہم کر سکے۔
لائیو ٹی وی