سندھ ہائیکورٹ: مونس علوی کو سی ای او کے-الیکٹرک کےعہدے سے ہٹانے کا فیصلہ معطل، جرمانہ برقرار
سندھ ہائی کورٹ نے صوبائی محتسب کا مونس علوی کو کے-الیکٹرک کے چیف ایگزیکٹو افسر (سی ای او) کے عہدے سے ہٹانے کا فیصلہ معطل کردیا۔
ڈان نیوز کے مطابق سی ای او کے-الیکٹرک مونس علوی نے ہراسانی کیس میں صوبائی محتسب کے عہدے سے ہٹانے کے فیصلے کو سندھ ہائی کورٹ میں چیلنج کیا تھا۔
مونس علوی اپنے وکیل کے ہمراہ عدالت میں پیش ہوئے، عدالت نے صوبائی محتسب کا مونس علوی کو عہدے سے ہٹانے کا فیصلہ معطل کردیا۔
عدالت نے مونس علوی کو 25 لاکھ روپے جرمانےکی رقم ناظر کے پاس جمع کروانے کی ہدایت کرتے ہوئے صوبائی محتسب اور شکایت کنندہ کو نوٹس جاری کردیے۔
عدالت نے استفسار کیا کہ صوبائی محتسب کا قانون کہاں ہے؟ وکیل مونس علوی نے کہا کہ سندھ میں وفاقی قانون لاگو ہوتا ہے لیکن صوبائی محتسب بنایا ہوا ہے۔
جسٹس فیصل کمال عالم نے استفسار کیا کہ فیصلے میں کیا غلط ہے، وکیل نے کہا کہ کیس کی سماعت کا اختیار وفاقی محتسب کو ہے صوبائی کو نہیں، صوبائی محتسب کی جانب سے دی گئی سزا غیر قانونی ہے۔
واضح رہے کہ صوبائی محتسب جسٹس (ر) شاہ نواز طارق نے جمعرات کو کے-الیکٹرک کی سابق چیف مارکیٹنگ افسر مہرین زہرہ کو ہراساں کرنے پر کمپنی کے سی ای او مونس علوی پر 25 لاکھ روپے جرمانہ عائد کرتے ہوئے انہیں عہدے سے ہٹانے کا حکم دیا تھا۔
صوبائی محتسب نے کہا تھا کہ سی ای او کے الیکٹرک نے شکایت کنندہ مہرین زہرہ کو ہراساں اور ذہنی اذیت میں مبتلا کیا، مونس علوی اگر جرمانے کی رقم ادا نہ کریں تو ان کی منقولہ اور غیر منقولہ جائیداد ضبط کی جائے جبکہ شناختی کارڈ اور پاسپورٹ بھی بلاک کیا جائے۔
مونس علوی کے خلاف کے الیکٹرک کی سابق چیف مارکیٹنگ افسر مہرین زہرہ نے شکایت درج کرائی تھی، شکایت کنندہ کو 2019 میں کے الیکٹرک نے بطور کنسلٹنٹ رکھا تھا۔
لائیو ٹی وی