کراچی: ڈیفنس میں فائرنگ سے سینئر وکیل خواجہ شمس الاسلام جاں بحق، ملزم سابق گن مین کا بیٹا نکلا
کراچی کے علاقے ڈیفنس فیز 6 میں مسجد کے باہر فائرنگ سے سینئر وکیل خواجہ شمس الاسلام جاں بحق اور ان کے بیٹے سمیت 2 افراد زخمی ہوگئے، ملزم مقتول کے سابق گن مین کا بیٹا نکلا۔
پولیس کے مطابق خواجہ شمس الاسلام خیابان راحت میں نماز پڑھ کر مسجد سے نکلے تھے کہ گھات لگائے نامعلوم ملزمان نے ان پر فائرنگ کردی جس کے نتیجے میں سینیئر وکیل جاں بحق اور ان کے بیٹے سمیت 2 افراد زخمی ہوگئے۔
ڈی آئی جی ساؤتھ کے مطابق خواجہ شمس الاسلام پر فائرنگ کرنے والے ملزم کی شناخت کرلی گئی، ملزم مقتول کے سابق گن مین کا بیٹا عمران آفریدی نکلا۔
ڈی آئی جی ساؤتھ کے مطابق ملزم نے چند ماہ پہلے بھی خواجہ شمس الاسلام پرحملہ کیا تھا، ملزم کا الزام تھا اس کے والدکو خواجہ شمس الاسلام نے قتل کرایا تھا۔
دریں اثنا پولیس کا کہنا ہے کہ ملزم عمران آفریدی کی گرفتاری کے لیے حکمت عملی تیارکرلی ہے اور شہر سے باہر جانے والے مختلف مقامات پر ناکہ بندی کر دی گئی ہے۔
پولیس کے مطابق ملزم کی تصاویر اور دیگر تفصیلات پولیس ناکوں تک پہنچا دی گئی ہیں۔
پولیس کے مطابق فائرنگ کے نتیجے میں خواجہ شمس السلام اور ان کے بیٹے سمیت 2 افراد زخمی ہوئے تھے، جنہیں نجی ہسپتال منتقل کیا گیا تھا، جہاں خواجہ شمس الاسلام زخموں کی تاب نہ لاتے ہوئے دم توڑ گئے، انہیں 3 گولیاں لگی تھیں، مرحوم نماز جمعہ کے بعد نماز جنازہ میں شرکت کرکے مسجد سے باہر نکل رہے تھے کہ ملزم نے فائرنگ کردی۔
واقعے کے بعد پولیس کی نفری جائے وقوعہ پر پہنچ گئی جبکہ زخمیوں کو ہسپتال منتقل کردیا گیاہے، ایس ایس پی جنوبی کے مطابق واقعے کی تحقیقات کی جارہی ہیں۔
پولیس کے مطابق شمس الاسلام پر گزشتہ سال بھی حملہ ہوا تھا، جس میں ان کے کاندھے پر گولی لگی تھی۔
پولیس کے مطابق خواجہ شمس الاسلام متعدد ہائی پروفائل کیسز کی پیروی کر رہے تھے، وہ سول اور کرمنل کیسز کے معروف وکیل تھے، وہ زمینی تنازعات کے ماہر وکیل جانے جاتے تھے، ان کے خلاف ڈیفنس کے علاقے میں پولیس سےجھگڑے پر ایف آئی آر بھی درج ہوئی تھی۔
قبل ازیں واقعے کی سی سی ٹی وی فوٹیج سامنے آگئی ہے، جس میں فیس ماسک لگائے مسلح شخص کو مسجد کے احاطے میں سینئر وکیل پر فائرنگ کرتے ہوئے دیکھا جاسکتا ہے۔
پولیس کے مطابق جائے وقوع کے اطراف سے 3 سی سی ٹی فوٹیجز حاصل کرلی گئی ہیں جن میں ملزم کا چہرہ واضح ہے جس کی مدد سے اس کی شناخت کی کوشش کی جارہی ہے۔
پولیس کے مطابق ایک ملزم کو سی سی ٹی وی فوٹیج میں نظر آرہا ہے جبکہ دوسرا ملزم فائرنگ کرنے والے شخص کو بیک اپ فراہم کررہا تھا۔
دریں اثنا، وزیر داخلہ سندھ ضیا الحسن لنجار نے ڈیفنس میں فائرنگ کے واقعے کا نوٹس لیتے ہوئے ایس ایس پی جنوبی سے ابتدائی کاروائی کی رپورٹ طلب کرلی ہے ، وزیر داخلہ نے ہدایت کی ہے کہ ملزمان کی گرفتاری کے لیے فوری کارروائی کی جائے۔
لائیو ٹی وی