• KHI: Zuhr 12:38pm Asr 5:20pm
  • LHR: Zuhr 12:09pm Asr 5:02pm
  • ISB: Zuhr 12:14pm Asr 5:11pm
  • KHI: Zuhr 12:38pm Asr 5:20pm
  • LHR: Zuhr 12:09pm Asr 5:02pm
  • ISB: Zuhr 12:14pm Asr 5:11pm

نیوزی لینڈ کو فائنل میں شکست، آسٹریلیا ٹی20 کرکٹ کا نیا چیمپیئن

شائع November 14, 2021 اپ ڈیٹ November 15, 2021
آسٹریلیا نے پہلی مرتبہ ٹی20 چیمپیئن بننے کا اعزاز حاصل کیا ہے— فوٹو: اے ایف پی
آسٹریلیا نے پہلی مرتبہ ٹی20 چیمپیئن بننے کا اعزاز حاصل کیا ہے— فوٹو: اے ایف پی
آسٹریلیا کی ٹیم کا ٹرافی کے ہمراہ گروپ فوٹو— فوٹو: اے پی
آسٹریلیا کی ٹیم کا ٹرافی کے ہمراہ گروپ فوٹو— فوٹو: اے پی
ڈیوڈ وارنر نے عمدہ بیٹنگ کرتے ہوئے نصف سنچری اسکور کی— فوٹو: رائٹرز
ڈیوڈ وارنر نے عمدہ بیٹنگ کرتے ہوئے نصف سنچری اسکور کی— فوٹو: رائٹرز
میچ میں فتح کے بعد مچل مارش اور میکسویل کا فاتحانہ انداز— فوٹو: رائٹرز
میچ میں فتح کے بعد مچل مارش اور میکسویل کا فاتحانہ انداز— فوٹو: رائٹرز

ٹی20 ورلڈ کپ 2021 کے فائنل میں آسٹریلیا نے عمدہ کاررکردگی کا مظاہرہ کرتے ہوئے نیوزی لینڈ کو 8 وکٹوں سے شکست دے کر ٹی20 کرکٹ کا نیا چیمپیئن بننے کا اعزاز حاصل کر لیا۔

دبئی میں کھیلے گئے ایونٹ کے فائنل میچ میں آسٹریلیا نے ٹاس جیت کر نیوزی لینڈ کو بیٹنگ کی دعوت دی۔

نیوزی لینڈ کے اوپنرز مارٹن گپٹل اور ڈیرل مچل نے مثبت انداز میں اننگز کا آغاز کیا اور ابتدائی اوورز میں کوئی وکٹ نہ گرنے دی۔

دونوں نے ٹیم کو 28 رنز کا آغاز فراہم کیا لیکن ہیزل وُڈ نے اپنی ٹیم کو پہلی کامیابی دلاتے ہوئے سیمی فائنل کے ہیرو مچل کی اہم وکٹ حاصل کر لی۔

نیوزی لینڈ کو پہلی وکٹ گرنے کے بعد آسٹریلین باؤلرز کی نپی تلی باؤلنگ کے سبب رنز بنانے میں مشکلات کا سامنا ہے۔

کین ولیمسن کو 21 کے مجموعی اسکور پر ایک موقع ملا جب باؤنڈری پر موجود جوز ہیزل وُڈ ان کا کیچ نہ لے سکے اور گیند باؤنڈری کے پار چلی گئی۔

ولیمسن نے اس موقع کا فائدہ اٹھایا اور مچل اسٹارک کے اوور میں 19 رنز بنائے اور پھر انہی کی جانب سے کرائے گئے 16ویں اوور میں 22 رنز بنائے۔

مارٹن گپٹل اور ولیمسن کے درمیان 48 رنز کی شراکت قائم ہوئی لیکن زامپا کو چھکا مارنے کی کوشش میں گپٹل مڈ وکٹ باؤنڈری پر کیچ دے بیٹھے۔

تاہم پورے ٹورنامنٹ میں آؤٹ آف فارم رہنے والے ولیمسن نے فائنل میں بہترین کھیل پیش کرتے ہوئے نصف سنچری مکمل کی۔

ولیمسن نے نئے بلے باز گلین فلپس کے ساتھ تیسری وکٹ کے لیے 68رنز کی شراکت قائم کی جس میں فلپس کا حصہ صرف 18رنز کا رہا۔

فلپس 18رنز بنانے کے بعد ہیزل وُڈ کی دوسری وکٹ بن گئے جبکہ دو گیند بعد ولیمسن بھی چلتے بنے۔

ولیمسن نے 48 گیندوں پر 10 چوکوں اور 3 چھکوں کی مدد سے 85 رنز کی اننگز کھیلی جو ٹی20 ورلڈ کپ فائنل میں اب تک کسی بھی ٹیم کے کپتان کی جانب سے کھیلی گئی سب سے بڑی اننگز ہے۔

ٹی20 ورلڈ کپ فائنل میں بحیثیت کپتان سب سے بڑی اننگز کھیلنے کا اعزاز کمار سنگاکار کے پاس تھا جنہوں نے 2009 کے فائنل میں پاکستان کے خلاف 64 رنز کی اننگز کھیلی تھی۔

ہیزل وُڈ نے شاندار باؤلنگ کرتے ہوئے 4 اوورز کے کوٹے میں 16 رنز کے عوض میں 3 وکٹیں لیں جبکہ ایڈم زامپا نے ایک وکٹ لی۔

نیوزی لینڈ نے مقررہ اوورز میں 4 وکٹوں کےنقصان پر 172رنز بنائے جو ٹی20 ورلڈ کپ فائنل میں کسی بھی ٹیم کا سب سے بڑا اسکور ہے۔

آسٹریلیا نے ہدف کا تعاقب شروع کیا تو اوپنرز نے اسکور کو 15 تک پہنچایا ہی تھا کہ تیسرے اوور میں کپتان ایرون فنچ صرف پانچ رنز بنانے کے بعد ٹرینٹ بولٹ کی وکٹ بن گئے۔

پہلی وکٹ گرنے کے بعد ڈیوڈ وارنر کا ساتھ دینے مچل مارش آئے اور دونوں عمدہ بیٹنگ کرتے ہوئے 92رنز سے زائد کی شراکت قائم کر چکے ہیں۔

ڈیوڈ وارنر نے عمدہ فارم کا سلسلہ جاری رکھتے ہوئے نصف سنچری مکمل کی اور 38 گیندوں پر 53 رنزکی اننگز کھیلی لیکن اس مرحلے پر ٹرینٹ بولٹ نے انہیں اپنا شکار کر لیا۔

دوسرے اینڈ سے مچل مارش نے شاندار بیٹنگ کا سلسلہ جاری رکھا اور نصف سنچری اسکور کرنے کے ساتھ ساتھ میکسویل کے ساتھ ناقابل شکست شراکت قائم کر کے آسٹریلیا کو فتح سے ہمکنار کرا لیا۔

آسٹریلیا نے 7 گیندوں قبل ہی ہدف حاصل کر کے پہلی مرتبہ ٹی20 چیمپیئن بننے کا اعزاز حاصل کر لیا۔

مچل مارش نے 50 گیندوں پر 4 چھکوں اور 6 چوکوں کی مدد سے 77 رنز بنائے جبکہ میکسویل نے 18 گیندوں کے بعد 28 رنز بنائے۔

مچل مارش کو ان کی عمدہ بیٹنگ پر میچ کا بہترین کھلاڑی قرار دیا گیا جبکہ ورلڈ کپ میں 289 رنز بنانے والے ڈیوڈ وارنر کو پلیئر آف دی ٹورنامنٹ قرار دیا گیا۔

واضح رہے کہ بابر اعطم نے وارنر سے ایک میچ کم کھیلنے کے باوجود سب سے زیادہ 303 رنز بنائے تھے۔

میچ کے لیے دونوں ٹیمیں ان کھلاڑیوں پر مشتمل تھیں۔

آسٹریلیا: ایرون فنچ(کپتان)، اسٹیون اسمتھ، ڈیوڈ وارنر، گلین میکسویل، میتھیو ویڈ، مچل مارش، مارکس اسٹوئنس، پیٹ کمنز، مچل اسٹارک، ایڈم زامپا اور جوش ہیزل وُڈ۔

نیوزی لینڈ: کین ولیمسن(کپتان)، مارٹن گپٹل، ڈیرل مچل، ٹم سیفرٹ، گلین فلپس، جیمز نیشام، مچل سینٹنر، ٹم ساؤدھی، ٹرینٹ بولٹ، اش سودھی، ایڈم ملنے

کارٹون

کارٹون : 19 جولائی 2024
کارٹون : 17 جولائی 2024