وفاقی وزیر اطلاعات فواد چوہدری نے اعلان کیا ہے کہ سعودی عرب نے سفری پابندی ہٹاتے ہوئے یکم دسمبر سے پاکستان سے براہِ راست پروازوں کو اجازت دینے کا فیصلہ کیا ہے۔

ڈان اخبار کی رپورٹ کے مطابق فواد چوہدری نے ٹوئٹ میں کہا کہ سعودی عرب کی ہدایت پر آئندہ ہفتے بدھ سے فیصلے پر عمل درآمد کیا جائے گا۔

میڈیا رپورٹس کے مطابق سعودی عرب نے جن ممالک سے سفری پابندی ہٹانے کا فیصلہ کیا ہے ان میں پاکستان، بھارت، انڈونیشیا، مصر، برازیل اور ویتنام شامل ہیں اور ان ممالک کے شہریوں کو کسی بھی تیسرے ملک میں 14 روز قرنطینہ میں گزارنے کی ضرورت نہیں ہوگی۔

مزید پڑھیں: سعودی عرب نے پاکستان سمیت کئی ممالک کیلئے سفری پابندیوں میں اضافہ کردیا

سعودی عرب نے ان 6 ممالک کے مسافروں پر عارضی پابندیاں عائد کی تھیں جنہوں نے ملک میں کورونا وائرس ویکسین کی 2 خوراکیں نہیں لی تھیں۔

سعودی سول ایوی ایشن نے سعودی عرب میں آپریٹ کرنے والی ایئرلائنز کو جاری کردہ ہدایت میں کہا ہے کہ’ وہ جمہوریہ انڈونیشیا، اسلامی جمہوریہ پاکستان، وفاقی جمہویہ برازیل، سماجی جمہوریہ ویتنام، عرب ریپلک مصر اور بھارت کو براہِ راست پروازوں کی اجازت دی جارہی ہے‘۔

انہوں نے کہا کہ ان ممالک سے آنے والے مسافروں کو 14 روز ملک سے باہر قرنطینہ میں گزارنے کی ضرورت بھی نہیں ہوگی۔

مزید پڑھیں: سعودی عرب کا ویکسینیٹڈ سیاحوں کیلئے سرحدیں کھولنے کا اعلان

ہدایت میں کہا گیا ہے کہ مملکت سے باہر مسافروں کی ویکسین سے قطع نظر ادارتی قرنطینہ کا دورانیہ 5 روز ہوگا اور اس سلسلے میں مخصوص گروپوں کے لیے استثنیٰ پر عمل درآمد جاری رہے گا۔

ترجمان پی آئی اے کا کہنا تھا کہ جو بھی سعودی عرب کا سفر کرنا چاہتا ہے وہ ٹکٹ کے لیے ایئرلائن سے رابطہ کر سکتا ہے۔