’200 یونٹ والی بدمعاشی کو ختم کریں‘، بجلی کے نرخوں میں تبدیلی پر نعمان اعجاز کا طنزیہ تبصرہ
بجلی کے نرخوں میں حالیہ رد و بدل پر جہاں عوام پریشان نظر آتی ہے، وہیں اداکار نعمان اعجاز نے بھی بڑھتے یونٹس اور قیمتوں پر شدید ناپسندیدگی کا اظہار کیا۔
پاکستان میں بجلی کے نرخ آئے دن بڑھتے رہتے ہیں، جس سے ہر طبقے سے تعلق رکھنے والا فرد متاثر ہوتا ہے۔
بجلی کے زائد بلوں کے ساتھ ساتھ لوڈشیڈنگ بھی عوام کو مشکلات میں ڈالتی ہے، جو اس شدید گرمی میں کسی سزا سے کم نہیں ہے۔
حال ہی میں نیشنل الیکٹرک پاور ریگولیٹری اتھارٹی (نیپرا) نے فیصلہ جاری کیا ہے، جس کے تحت گھریلو صارفین کے لیے بجلی کے مختلف یونٹس پر ٹیرف میں رد و بدل کیا گیا ہے۔
ایک سے 100 یونٹ تک بجلی استعمال کرنے والوں کے لیے نرخ 10.54 روپے فی یونٹ مقرر کیا گیا ہے، جب کہ 101 سے 200 یونٹس پر 13 روپے اور نان پروٹیکٹڈ صارفین کے لیے 22.44 روپے فی یونٹ طے کیا گیا ہے۔
اس کے علاوہ 201 سے زائد یونٹس پر نرخ 28.91 روپے سے 47.69 روپے فی یونٹ تک مقرر کیے گئے ہیں، جو استعمال کے مطابق مختلف ہوں گے۔
نیپرا کی جانب سے جاری کردہ اس فیصلے کا اطلاق حکومت کی منظوری کے بعد ہوگا۔
نعمان اعجاز نے یونٹس اور بجلی کے نرخوں پر طنز کرتے ہوئے سوشل میڈیا پر ایک پوسٹ شیئر کی۔
انہوں نے لکھا کہ اس شدید گرمی میں ایک عام آدمی کبھی میٹر کی طرف دیکھتا ہے، کبھی سورج کی طرف اور کبھی اپنے بچوں کی طرف۔
انہوں نے مزید لکھا کہ خدارا، عام آدمی پر رحم فرمائیں اور 200 یونٹ والی بدمعاشی کو ختم کر دیں۔
لائیو ٹی وی