امریکا کو فروخت سے قبل ٹک ٹاک کا نیا ورژن تیار کیا جارہا ہے، رپورٹ
ٹک ٹاک کی مالک چینی کمپنی بائٹ ڈانس امریکی صارفین کے لیے اپنی ایپ کا نیا ورژن تیار کررہی ہے۔
عالمی خبر رساں ادارے رائٹرز نے دی انفارمیشن کے حوالے سے رپورٹ دی ہے کہ ٹک ٹاک امریکا میں سرمایہ کاروں کے ایک گروپ کو فروخت کے منصوبے کے تحت امریکی صارفین کے لیے اپنی ایپ کا نیا ورژن تیار کر رہا ہے، رپورٹ میں نامعلوم ذرائع کا حوالہ دیا گیا ہے۔
یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ نے جمعے کے روز کہا تھا کہ وہ پیر یا منگل کو چین سے ممکنہ ٹک ٹاک ڈیل پر بات چیت شروع کریں گے، ٹرمپ نے کہا کہ امریکا کے پاس ٹک ٹاک شارٹ ویڈیو ایپ کی فروخت پر ’ تقریباً معاہدہ“’ تیار ہے۔
رپورٹ کے مطابق ٹک ٹاک نے منصوبہ بنایا ہے کہ وہ 5 ستمبر کو امریکی ایپ اسٹورز میں نئی ایپ لانچ کرے گا۔
گزشتہ ماہ ٹرمپ نے چین کی کمپنی بائٹ ڈانس کو ٹک ٹاک کے امریکی اثاثے فروخت کرنے کی ڈیڈ لائن 17 ستمبر تک بڑھا دی تھی۔
رپورٹ میں مزید کہا گیا ہے کہ صارفین کو سروس استعمال کرنے کے لیے آخرکار نئی ایپ ڈاؤن لوڈ کرنا پڑے گی، حالانکہ موجودہ ایپ اگلے سال مارچ تک کام کرتی رہے گی، تاہم یہ ٹائم لائن تبدیل بھی ہو سکتی ہے۔
ٹک ٹاک نے اس رپورٹ پر رائٹرز کی درخواست پر فوری طور پر کوئی تبصرہ نہیں کیا، اور رائٹرز بھی اس رپورٹ کی فوری تصدیق نہیں کر سکا۔
خیال رہے کہ اس سال کے آغاز میں ایک معاہدہ تیار کیا گیا تھا کہ ٹک ٹاک کے امریکی آپریشنز کو ایک نئی امریکی کمپنی میں تبدیل کیا جائے، جس کی اکثریتی ملکیت اور آپریشن امریکی سرمایہ کاروں کے ہاتھ میں ہوں، لیکن جب ٹرمپ نے چینی مصنوعات پر بھاری ٹیکس لگانے کا اعلان کیا تو چین کی جانب سے اعتراض کے بعد یہ معاہدہ مؤخر کر دیا گیا۔
ٹرمپ نے کہا ہے کہ امریکا کو شاید چین سے اس معاہدے کی منظوری لینی پڑے گی۔
لائیو ٹی وی