امریکی سینیٹ میں برنی سینڈرز کی اسرائیل کو اسلحے کی فروخت روکنے کی 2 قراردادیں مسترد
امریکی سینیٹ میں غزہ میں شہری ہلاکتوں کے ردِ عمل میں اسرائیل کو اسلحے کی فروخت روکنے کے لیے پیش کی گئی 2 قراردادیں مسترد ہو گئیں، تاپ، انہیں اس سال کے اوائل میں پیش کی گئی اسی نوعیت کی قراردادوں کے مقابلے میں زیادہ حمایت ملی۔
برطانوی خبر رساں ادارے ’رائٹرز‘ کے مطابق یہ دونوں قراردادیں ورمونٹ سے تعلق رکھنے والے آزاد رکن اور ڈیموکریٹس کے حامی تصور کیے جانے والے سینیٹر برنی سینڈرز نے پیش کی تھیں، 100 رکنی ایوان میں یہ قراردادیں بالترتیب 73 کے مقابلے میں 24 اور 70 کے مقابلے میں 27 ووٹوں سے مسترد کی گئیں۔
برنی سینڈرز نے ایک بیان میں کہا کہ وہ اس بات پر خوش ہیں کہ ڈیموکریٹک کاکس کی اکثریت نے اس کوشش کی حمایت کی۔
انہوں نے کہا کہ ماحول بدل رہا ہے، امریکی عوام اربوں ڈالر اس مقصد کے لیے خرچ نہیں کرنا چاہتے کہ غزہ میں بچوں کو بھوکا رکھا جائے، ڈیموکریٹس اس مسئلے پر آگے بڑھ رہے ہیں اور مجھے جلد ریپبلکنز کی حمایت کی بھی امید ہے۔
یہ قراردادیں 67 کروڑ 50 لاکھ ڈالر مالیت کے بموں کی فروخت اور 20 ہزار خودکار رائفلوں کی ترسیل کو روکنے کے لیے پیش کی گئی تھیں۔
لائیو ٹی وی