بنگلہ دیش میں دو ٹرینوں کے درمیان تصادم، 16 افراد ہلاک

اپ ڈیٹ 12 نومبر 2019
بنگلہ دیش ریلوے اتھارٹیز نے 3 تحقیقاتی کمیٹیاں قائم کردی ہیں، وزیر ریلوے — فوٹو: اے ایف پی
بنگلہ دیش ریلوے اتھارٹیز نے 3 تحقیقاتی کمیٹیاں قائم کردی ہیں، وزیر ریلوے — فوٹو: اے ایف پی

بنگلہ دیش کے مشرقی علاقے میں 2 ٹرینوں کے درمیان تصادم سے 16 افراد ہلاک اور کئی زخمی ہوگئے۔

غیر ملکی خبر رساں ادارے 'اے پی' کی رپورٹ کے مطابق بنگلہ دیش کے برہمنباریا ضلع کے مقامی پولیس سربراہ شیامال کانتی داس کا کہنا تھا کہ اودایان ایکسپریس اور ترنا نیشیتا ٹرینیں ایک ہی ٹریک پر آمنے سامنے سے آرہی تھیں جن کی ٹکر ہوئی۔

یہ علاقہ دارالحکومت ڈھاکا سے مشرق کی جانب 82 کلومیٹر کی مسافت پر ہے۔

مزید پڑھیں: سعودی عرب: ٹرین اسٹیشن میں خوفناک آتشزدگی

مقامی حکومت کے منتظم حیات الدولہ خان کا کہنا تھا کہ واقعے میں 16 افراد ہلاک ہوئے جبکہ 40 زخمیوں کا متعدد ہسپتالوں میں علاج جاری ہے۔

بنگلہ دیش کے خبر رساں ادارے 'یونائیٹڈ نیوز' کے مطابق واقعے میں 100 سے زائد افراد زخمی ہوئے۔

ٹی وی پر دکھائی جانے والی فوٹیج میں ریسکیو حکام کو ٹرین کی تباہ شدہ بوگیوں میں سے لاشوں کو نکالتے دیکھا گیا اور لاشیں بیگز کے ذریعے ہسپتالوں کے مردہ خانے منتقل کی گئیں۔

یہ بھی پڑھیں: رحیم یار خان: تیزگام ایکسپریس میں آتشزدگی، جاں بحق افراد کی تعداد 74 ہوگئی

بنگلہ دیش کے وزیر ریلوے محمد نورالدین اسلان کا کہنا تھا کہ بنگلہ دیش ریلوے اتھارٹیز نے 3 تحقیقاتی کمیٹیاں قائم کردی ہیں۔

ان کا کہنا تھا کہ 'کمیٹیوں کو جلد سے جلد تحقیقات مکمل کر کے رپورٹ پیش کرنے کا حکم دیا گیا ہے'۔

تاہم حکام کا کہنا ہے کہ ابتدائی تحقیقات میں ترنا نشیتا ٹرین کا ڈرائیور حادثے کا ذمہ دار پایا گیا ہے کیونکہ اس نے سگنل کو نظر انداز کیا تھا۔

مذکورہ ڈرائیور اور دیگر 2 ڈرائیوروں کو معطل کردیا گیا ہے۔

واضح رہے کہ بنگلہ دیش میں ٹرین حادثات اکثر رونما ہوتے رہتے ہیں جن کی اکثر وجوہات ریلوے کراسنگس، سگنل دینے کے نظام میں خرابی اور ٹریک کی خراب حالت ہوتی ہیں۔

ضرور پڑھیں

تبصرے (0) بند ہیں