• KHI: Fajr 4:17am Sunrise 5:44am
  • LHR: Fajr 3:24am Sunrise 5:00am
  • ISB: Fajr 3:21am Sunrise 5:01am
  • KHI: Fajr 4:17am Sunrise 5:44am
  • LHR: Fajr 3:24am Sunrise 5:00am
  • ISB: Fajr 3:21am Sunrise 5:01am

پاکستانی ساختہ سیٹلائٹ آئندہ ماہ خلا میں روانہ کیا جائے گا

شائع June 25, 2018
پاکستانی ساختہ سیٹلائٹ، پاک ٹیس-اے ون — فوٹو بشکریہ، دفتر خارجہ
پاکستانی ساختہ سیٹلائٹ، پاک ٹیس-اے ون — فوٹو بشکریہ، دفتر خارجہ

اسلام آباد: وزارت خارجہ امورکی جانب سے اعلان کیا گیا ہے کہ پاکستان میں تیار کردہ 2 سو 85 کلوگرام وزن کا حامل پاک ٹیس-اے ون نامی آبزرویٹری سیٹلائٹ آئندہ ماہ جولائی میں خلا میں روانہ کردیا جائے گا۔

حساس آلات اور کیمروں سے لیس پاک ٹیس-اے ون نامی یہ سیٹیلائٹ خلا میں 610 کلو میٹر کے فاصلے پر موجود رہے گا اور سورج کے حساب سے اپنی جگہ تبدیل نہیں کرے گا۔

یہ بھی پڑھیں: پاکستان کا پہلا کیوب سیٹ سیٹیلائٹ روس سے لانچ کردیا گیا

اس حوالے سے دفتر خارجہ کے ترجمان ڈاکٹر محمد فیصل نے سماجی رابطے کی ویب سائٹ ٹویٹر پر ایک ٹوئٹ کے ذریعے سائنسدانوں کو مبارک باد پیش کرتے ہوئے کہا کہ آپ نے پاکستان کو قابل فخر بنایا۔

خیال رہے کہ ریموٹ سینسنگ سیٹلائٹ (آر ایس ایس) کے نام سے معروف اس سیٹلائٹ کی مدد سے زمین کے کئی خدوخال کا جائزہ لیا جاسکتا ہے اور معدنی ذخائر کا اندازہ بھی لگایا جاسکتا ہے۔

اس کے ساتھ سیٹلائٹ میں نصب حساسیت محسوس کرنے والے آلات کے سبب آر ایس ایس موسمیاتی تبدیلیوں کا جائزہ لینے میں بھی مددگار ثابت ہوگا، جس میں گلیشیئرز پگھلنے کا عمل، گرین ہاؤس گیسز کا اخراج، جنگلات میں لگی آگ کو جانچنا اور زراعت اور جنگلات سے متعلق مسائل کو حل کرنا بھی شامل ہے۔

تاہم مذکورہ کاموں کے علاوہ بھی سیٹلائٹ مزید فعال اور غیر فعال سرگرمیاں انجام دینے کی صلاحیت رکھتا ہے۔

مزید پڑھیں: بھارت نے ’مواصلاتی سیٹلائٹ‘ خلا میں چھوڑ دیا

خیال رہے کہ سیٹلائٹ کے لیے سمت کا تعین کرنے والی ٹیکنالوجی سال 2012 میں چین سے حاصل کی گئی تھی۔

اس حوالے سے جب قومی خلائی ادارے، پاکستانی اسپیس اینڈ اپر ایٹموسفیئر ریسرچ کمیشن(سپارکو) اور پاک فوج کے شعبہ تعلقات عامہ (آئی ایس پی آر) سے رابطہ کیا گیا تو انہوں نے سیٹلائٹ کے حوالے سے معلومات فراہم کرنے میں ہچکچاہٹ کا مظاہرہ کیا۔

وا ضح رہے بھارت کی جانب سے اس قسم کی سیٹیلائٹ خلا میں بھیجنے کا سلسلہ 1970 سے جاری ہے۔

اس ضمن میں سابق وزیر برائے سائنس اور ٹیکنالوجی ڈاکٹر عطا الرحمٰن نے اپنے خیالات کا اظہار کرتے ہوئے پاکستانی سائنسدانوں کو مبارکباد پیش کی۔

ان کا کہنا تھا کہ آئندہ ماہ سیٹلائٹ خلا میں بھیجنا ایک قبل فخر لمحہ اور مثبت قدم ہے، کیونکہ ہمارے سائنسدان سیٹلائٹ بنانے اور خلا میں بھیجنے کی صلاحیت بھی رکھتے ہیں۔

یہ بھی پڑھیں: امریکا اب خلا میں بھی فوج بھیجے گا

دفتر خارجہ کے ترجمان ڈاکٹر محمد فیصل نے کہا کہ بھاری بھرکم اور بڑے مواصلاتی سیٹلائٹس کے مقابلے میں آبزرویٹری سیٹلائٹ ایک سادہ ٹیکنالوجی ہے جس میں نصب مختلف قسم کے مشاہداتی آلات کے سبب کئی سرگرمیاں سرانجام دی جاسکتی ہیں جبکہ اس سے برقی مقناطیسی لہروں اور زمین سے اٹھنے والی شعاعوں کے اخراج کا بھی اندازہ لگایا جاسکتا ہے۔

ان کا مزید کہنا تھا کہ خطے میں پاکستان خلائی سرگرمیوں میں بہت زیادہ پیچھے ہے جبکہ بھارت کے مقابے میں بھی ہم ابھی 25-30 سال پیچھے ہیں۔


یہ خبر 25 جون 2018 کو ڈان اخبار میں شائع ہوئی۔

تبصرے (1) بند ہیں

KHAN Jun 25, 2018 05:59pm
اس سیٹلائٹ کی تیاری میں شامل سائنسدانوں، ماہرین اور تمام اداروں کو مبارکباد پیش کرتے ہیں، اسپارکو و انسٹیٹوٹ آف اسپیس ٹیکنالوجی سے بہت زیادہ امیدیں وابستہ ہیں۔

کارٹون

کارٹون : 26 مئی 2024
کارٹون : 24 مئی 2024